لميس الحديدي: على المدير الفني للمنتخب أن يكون على قدر تمثيل مصر

علّقت الإعلامية لميس الحديدي على حصول منتخب مصر على المركز الرابع في كأس الأمم الإفريقية 2025، عقب خسارته أمام نظيره نيجيريا بنتيجة 4-2 بركلات الترجيح، وذلك بعد انتهاء المباراة بالتعادل السلبي.
وقالت: "كلنا زعلانين، والمصريين كلهم، المشهد كله وحش، بعد ما كان لدينا أمل ورجعت الروح لينا، وإحنا بنحب الكرة، والمفروض هي بتحبنا، وبنحب نلعب كورة والمنتخب".

تصريحات حسام حسن

وتابعت خلال برنامجها "الصورة" المذاع على شاشة النهار قائلة: "المشهد كله وحش، بداية من ماتش السنغال، وتصريحات حسام حسن، ورد الفعل المبالغ فيه من الصحافة المغربية والجمهور. المشهد كله دمه تقيل وسخيف، ونرجع تاني نقول لدينا مشكلة في الإدارة والمنظومة الرياضية محتاجة تتعالج من الجذور، وهو نفس الكلام اللي بنقوله بعد كل مشكلة أو خسارة، سواء بطولة أو دوري، فالمشكلة أكبر من مباراة أو بطولة".

15 عاما بدون ألقاب

وواصلت: "عرفنا دلوقتي إحنا فين في إفريقيا، بقالنا 15 سنة لا نحصل على اللقب، ونفضل نقول إحنا 7 نجوم، الكلام ده كان زمان مش دلوقتي، لو إحنا كويسين أو بنلعب كرة كويسة، ولو لدينا روح رياضية، ولو كنا حاسين بقوتنا في الملعب مش في مكان تاني، ما كانش حاجة زي دي حصلت. وحتى لو خسرنا، كنا خسرنا بشرف، ودي طبيعة الكرة. نلعب كويس على الأقل لإرضاء الجمهور".
وأردفت: "لو كنا خرجنا من البداية، كما كانت كثير من التوقعات، كنا هنرضى وخلاص، ده توبنا، وهنكون عارفين إننا مش كويسين من الأول. لكن الفريق هذا العام منحنا الأمل في كل مباراة".

الخوف من التصريحات

وواصلت: "عندنا عناصر جيدة في المنتخب وجيدة جدا، لكن فيه حاجة غلط في الناحية البدنية والسرعات، ولكن إفريقيا سبقتنا بمسافات. ونحن لم نكن موجودين أمام السنغال، مكناش موجودين وملعبناش، لعبنا حاجة تانية غير الكرة".

وأكملت: "من هنا حدثت المشكلة، وكلنا بنخاف من حسام حسن، مش في التدريب لكن في المؤتمرات والتصريحات، وجاءت التصريحات بردود أفعال، والكرة لا يجب أن تكون سببا في أزمة بين بلدين شقيقين مثل المغرب ومصر، هذا لا يستقيم".

لا يفوتك

محافظ الغربية يوجه بتشديد الرقابة على نظافة طنطا وكورنيشها

تمثيل مصر

وأردفت: "المدير الفني للمنتخب، خاصة في البطولات، يجب أن يعرف أنه يمثل مصر. يجب أن تكون تصريحاته دقيقة وبحساب. ومع تقديري لشعوره الجارف بالوطنية، وأننا مصر السبع نجوم والبطولات، لكن حاليا إحنا في الرابع، وقبل كده خرجنا من دور الـ16، والمفاخرة بالتاريخ لا تكفي وأحيانا تقلل من قيمتنا".
وأردفت: "مافيش داعي نفاخر بالتاريخ ونحن لا نملك الحاضر. وحتى لو كان هناك مشكلة في التنظيم، ليه ما قلناهاش وإحنا كسبانين؟ ونقولها وقت الخسارة؟ في الخسارة الأفضل عدم سياق المبررات. مين مش عاوزك تكسب؟ أنت اللي مش بتكسب. والنتيجة استفزيت الجمهور المغربي كله، بيصفر ضدك، ووقعت في فخ الصحفيين. صحيح بعض الأسئلة كانت مستفزة، لكن حسام حسن هو من بدأ بتصريحات غير منضبطة وغير لائقة. وأحيي المصريين الصحفيين بعد انسحابهم، لأن المدير الفني للمنتخب المصري يمثل مصر".