ميار الببلاوي: «إيناس الدغيدي السبب في إني أعمل مشهد ساخن في رمضان»

قالت الفنانة المعتزلة ميار الببلاوي في لقائها مع الإعلامية بسمة وهبة في برنامج العرافة المذاع على قناة النهار: "أنا روحت الحرم المكي ودعيت علي المخرجة إيناس الدغيدي بسبب مشاهد فيلم ديسكو، انا مكنتش بحبها ولا عايزة أعملها".

مشهد ساخن في فيلم ديسكو ديسكو لميار الببلاوي

قالت الإعلامية ميار الببلاوي:"صورت مشهد ساخن في فيلم ديسكو، لا يصح ولا يليق بشهر رمضان، أنا كنت بنت عندها 19 سنة وفرحانة إنها دخلت التمثيل وبتشتغل قدام نجلاء فتحي وصلاح ذو الفقار، ناس عمري ما كنت احلم اشتغل معاهم، فكنت مطيعة جدا وحابة الموضوع جدا، بس المشهد ده اتخضيت لأني متربية في بيت متدين ومكنتش قادرة أعمله دخلت علشان أعمل المشهد، قلت لهم نعمله بعد الفطار قالولي لأ وانا كنت صايمة، وكنا بنصور في الديسكو بالنهار والباقي فاطر لأنهم كانوا بيشربوا في صالة الديسكو، وقتها دخلت الحمام وقفلت علي نفسي وإيناس الدغيدي اتعصبت وقالت انت هتقعديني ساعتين لحد بعد الفطار علشان تعملي المشهد احنا عايزين نخلص ونمشي".

وأكملت كلامها قائلة: "كنت بعيط عشان معملش المشهد الساخن وقت الصيام، لقيت الفنانة نجلاء فتحي وهي زي السكر وكنت بموت فيها، ولو قالت لي ارمي نفسك في البحر كانت هارمي نفسي، قالت لي يلا يا حبيبتي تعالي اعملي المشهد، واقنعتني إن رمضان ده بتاع الفقراء بس واحنا مبناكلش فيه عشان نبقى زي الفقراء وعشان الفقراء ميحسوش إن إحنا بناكل وهما لأ فالموضوع مش محتاج انك ترفضي المشهد ومتخافيش والموضوع هيعدي، وعملت المشهد الساخن في نهار رمضان قبل الإفطار، وانا أهلي صعايدة والدنيا اتطربقت بسبب المشهد، بس انا كنت في بدايتي وده كان من ضمن التنازلات".

ندم وبكاء ميار الببلاوي على دورها في فيلم ديسكو ديسكو

"أنا مكنتش عايزة أعمل كل المشاهد اللي عملتها في فيلم ديسكو، لا كنت عايزة ألبس مايوه ولا مشهد عمرو عبد الجليل ولا مشهد شريف منير، والمشاهد دي كلها عملت لي مشاكل وانا الحمد لله اتحجبت ومش عايزة حاجة زي كده تتعرض ولا تجاب سيرتها".

الجمهور، موقع إخباري شامل يهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري بما يليق بقواعد وقيم الأسرة المصرية، لذلك نقدم لكم مجموعة كبيرة من الأخبار المتنوعة داخل الأقسام التالية، الأخبار، الاقتصاد، حوادث وقضايا، تقارير وحوارات، فن، أخبار الرياضة، شئون دولية، منوعات، علوم وتكنولوجيا، خدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.