"الشغل نعمة".. أول رد من سامح حسين بعد الهجوم عليه بسبب تصريحاته عن الإجازات

خرج الفنان سامح حسين، للرد على الهجوم الأخير عليه بسبب تصريحاته الأخيرة في احتفالية العيد بشأن تقليل الإجازات.

وكتب سامح حسين، عبر صفحته على موقع التواصل الاجتماعي «فيسبوك»: «جمهوري الحبيب .. كل سنة وانتم طيبين وبخير .. بناء على طلبكم .. والناس اللي طلبت تفسير لموضوع إني بطالب بإلغاء الأجازات في الأعياد الكلام ده طبعا غير حقيقي بالمرة».

وأوضح سامح حسين تصريحاته قائلا: «أنا زيكم بحب الأجازة وبحب زيكم اشتغل بإخلاص زي كل واحد في مجاله .. الأجازة دي نعمة من ربنا نشحن من خلالها قوتنا لمواصلة مشوار الحياة .. كل الموضوع إني اتمنيت إن أعياد مصر وأفراحها تزيد وتكتر وساعتها مش لازم ناخد الأعياد الجديدة دى كلها أجازة».

وأضاف:« لكني لم أقصد أبدا إلغاء الاجازات الرسمية .. وعلي فكرة إحنا بنحب الأجازة علشان بنشتغل .. أي حد جرب قلة الشغل مش هيحب الأجازة .. الشغل نعمة ربنا يديمها علينا ويعين كل واحد على حاله ويكرمنا جميعا ويرزقنا الخير .. يارب حياتكم تكون كلها أعياد وفرحة».

وعلقت الاعلامية ياسمين الخطيب، على تصريحات الفنان سامح حسين، على تقليص الإجازات.  

وكتبت ياسمين الخطيب، عبر صفحتها على موقع التواصل الاجتماعي فيسبوك :« يا أستاذ سامح.. حضرتك ما عندكش شغل تروحه كل يوم، والتصوير بتروحه بعربية مكيفة، أغلب المصريين بيشتغلوا 9 ساعات يوميًا، ده غير ساعتين تلاتة بيضيعوا في المواصلات (أتوبيسات وميكروباصات وتكاتك).. فلما تتكلم عن تقليص الإجازات، ماتتكلمش بلسانهم، ماتبقشش من جيب غيرك!». 

وقال سامح حسين، في احتفالية عيد الفطر أمام الرئيس عبد الفتاح السيسي: «مصر فيها حاجات حلوة كتير أوى ومن ضمنها أنك مش محتاج مناسبة معينة عشان تسمع جملة كل سنة وانت طيب، وتقدر تقولها أمام أي حد، ولو صغر دماغه معاك مش هتغلب وهتلاقي مناسبة، وإحنا شعب بيحب الحياة والاحتفالات».

وأضاف: «إحنا شعب أبهر العالم بقدرته العجيبة على الضحك في أصعب المواقف وربنا خلقنا كده بنحب الضحك والفرحة، والعيد فرحة، ويا رب يكتر أفراحنا، بس مش ضروري نأخذ كل الأعياد دي إجازات وورانا شغل كتير أوي».