شيكابالا: الزمالك يحقق البطولات في الأوقات الصعبة.. وجمهورنا دايمًا سر القوة
أكد محمود عبد الرازق «شيكابالا»، قائد نادي الزمالك السابق، أن النادي يمتلك قاعدة مميزة من اللاعبين الناشئين القادرين على تحمل المسؤولية، مشددًا على أن الظروف الصعبة دائمًا ما تُظهر معدن الزمالك الحقيقي، وذلك خلال تصريحاته ببرنامج «الكورة مع فايق» على قناة MBC مصر 2.
وقال شيكابالا إنه تابع عددًا من لاعبي قطاع الناشئين منذ سنوات، موضحًا:
«لو جيت للناشئين، محمد السيد، الخضري، محمد إبراهيم.. اتفرجت عليهم من كام سنة، وروحت قلت لجوميز على التلاتة دول وقتها»
وأضاف قائد الزمالك أن النادي اضطر للاعتماد على هؤلاء اللاعبين في توقيت صعب، مؤكدًا أنهم يمتلكون إمكانيات كبيرة رغم قسوة المرحلة:
«النهاردة الناس بتشوف إن عندنا لاعيبة كويسة في الناشئين، بس الزمالك أُجبر إن الناس دي تلعب، وفجأة بنقول للاعب من بيته العب، في ظروف صعبة جدًا، وربنا يكون في عونهم».
وأشار شيكابالا إلى أن الزمالك اعتاد التتويج في أصعب الظروف، مستشهدًا بتجارب سابقة:
«لما كنت موجود وأخدنا الدوري، أخدناه في ظروف زي دي، دوري فيريرا واللي قبله بتاع كارتيرون، الاتنين ورا بعض، دايمًا الزمالك بياخد الدوري في الأوقات الصعبة».
ووجه قائد الفريق رسالة قوية للاعبين وجماهير النادي، مؤكدًا على أهمية التكاتف:
«بقول لعيبة الزمالك وجمهوره، إحنا بننجح في الأوقات الصعبة، كتالوج الزمالك دايمًا غريب، ولما تحصل ظروف زي دي المفروض نقرب من بعض أكتر».
وتحدث شيكابالا عن دور الجماهير، مشددًا على أنها عنصر أساسي في دعم الفريق، خاصة في المرحلة الحالية:
«كان نفسي جمهورنا يبقى موجود في الماتش، حصلت ظروف، لكن إحنا محتاجين جمهورنا في ضهرنا يوم السبت».
واختتم تصريحاته بالتأكيد على أن جماهير الزمالك لا تشجع أفرادًا بعينهم، بل الكيان نفسه:
«جمهور الزمالك ما بيشجعش أشخاص، بيشجع الزمالك، محدش بيسوق جمهور الزمالك، الجمهور يحب اللاعب اللي بيدي كل حاجة عشان التيشيرت وبيموت نفسه في الملعب»
