محمد أشرف روقا يرد بقوة على الزمالك بعد فتح ملف مستحقاته

فتح محمد أشرف روقا، لاعب الزمالك السابق، النار على كل من عبد الواحد السيد مدير الكرة السابق، وأيمن عبد العزيز مدرب الفريق السابق، موجّهًا رسائل حاسمة عبر إنستجرام، بعد فتح ملف مستحقاته المتأخرة لدى النادي الأبيض.

وقال روقا: "أنا أول مرة أكتب تعليق على موضوع أو أرد على حد وأذكره باسمه، وهنا كلامي للكابتن عبد الواحد السيد. حضرتك عارف أنا بحبك وبحترمك، واللي حضرتك قلت إنه مش موجود في عقدي أو ملوش علاقة بالفسخ من طرف واحد، مش صحيح. أنا متربي كويس، ومش محتاج حد ييجي يقول لي إني متربي أو لا، وعارف أنا مين ومليش في الكذب والتحوير".

أما عن أيمن عبد العزيز، أضاف روقا: "حضرتك بتقول إن لما جيت نادي الزمالك جيت النادي من لا شيء، أنا مش مشكلتي إن حضرتك متعرفش حاجة. قبل ما أجي الزمالك لعبت أكثر من 100 مباراة، ولعبت منتخب أولمبي مع كابتن حسام البدري، ووصلت لمنتخب مصر مع كوبر، فأنا الحمد لله مروحتش النادي من لا شيء".

وتابع اللاعب: "أنا مش مقدم حجج كما تقول، ومليش في الجو ده، وكنت أحيانًا أقضي 5 أو 6 أشهر بدون أي دخل. فمش صحيح لما تقول إني خدت فلوس 6 سنين مجتش من سنة".

واختتم روقا تصريحاته موجّهًا رسالة حادة: "أما بالنسبة لحوار جوميز، فأنا مش محتاج أتحجج، وربنا وحده يعلم إذا كنت صادقًا أو لا. فلا تتحدث عني وأنت متعرفش حاجة، وركز في شغلك بدل ما كل فرقة تمسكها تفشل وبعدها تمشي".