أشرف عبد الباقي عن دوره في فيلم «السادة الأفاضل»: الشخصيات متشابكة والتضفيرة صعبه

علق الفنان أشرف عبد الباقي على دوره في فيلم "السادة الأفاضل" قائلاً: "الفيلم عندما يعرض على أي حد ويقرأه سيشعر أنه ليس عملاً عادياً، فيه كمية شخصيات متشابكة مع بعض بشكل رهيب، ومحدش هيحس إن حد هيختفي".

وأضاف خلال لقائه ببرنامج "الصورة" الذي تقدمه الإعلامية لميس الحديدي على شاشة "النهار": "التضفيرة داخل العمل بالنسبة لشخصيات الفيلم صعبة جدًا، وهناك عدد كبير من النجوم، وأزاي كلهم موجودين بالفعل، ومكتوب بشياكة أوي، والعلاقات بتتربط إزاي حتى نهاية العمل — وده قليل جدًا إننا نلاقيه ككتابة".

لوك أشرف عبد الباقي

وعن اللوك الذي ظهر به في دوره بالفيلم قال: "الموضوع ده شغل الناس، أنا فعلاً حلقت شعري من المنتصف وطولت الجانبين مع اللحية، فبقى مدي شكل جديد ومعملتوش قبل كده، والمخرج كريم الشناوي ساعدني في إبراز جوانب الشخصية، إزاي يتكلم ويتحرك ويتصرف. والصراحة المخرج خلانا نحس إن كل دور في الفيلم هو الأهم على الإطلاق".

أكمل ضاحكًا: "الشخصية تستحق إن الواحد يحلق لها!".

وعن إشادة نجوم العمل بحرصة على تقديم طعام الإفطار لهم يوميًا أثناء التصوير قال عبد الباقي: "ساندوتشات خفيفة كده".

ليرد الفنان طه الدسوقي ممازحًا: "كل يوم الصبح صينية كبيرة فيها جبنة رومي، وجبنة بيضا بالجرجير والخس ومعصور عليها ليمونة، بالإضافة لحلاوة بالموز والقشطة والعسل."لتعلق لميس الحديدي ضاحكة: "ده سكلانس؟!".

المخرج كريم الشناوي

أما المخرج كريم الشناوي قال أن فيلمه الجديد "السادة الأفاضل" ينتمي إلى فئة الأعمال اللايت كوميدي، مشيرًا إلى أنه يمثل تجربة مختلفة بالنسبة له، قائلاً:"قلنا نجرب حاجة جديدة، أنا اشتغلت قبل كده مع الكاتب مصطفى صقر، وهو ملك الكوميديا، لكن جمعنا قبل كده مسلسل غير كوميدي، ودي أول تجربة لينا سوا في الكوميديا".

وأضاف: "من زمان نفسي أعمل عمل كوميدي، لكن مكنتش لاقي المشروع المناسب. الكاتب مصطفى صقر حكالي على الفكرة، قلت له يلا بينا، لكن قعدت سنة كاملة لحد ما كلّمني وقال لي جهزنا".

العلاقات الإنسانية

وردًا على سؤال الإعلامية لميس الحديدي عن سر السحر في قدرته على إقناع هذا العدد الكبير من النجوم بالمشاركة في العمل حتى لو بأدوار قصيرة، قال الشناوي:"جزء من قوة الصناعة في البلد دي هو وجود هذا الكم الكبير من النجوم. وأنا لما ببعت الاسكريبت للأساتذة، كنت متوقع إن كل واحد فيهم عنده مليون مشروع، لكنهم وافقوا فورًا، وده شيء أنا بشكرهم عليه جدًا".

وأشاد الشناوي بروح فريق العمل التي يتميز بها الفنان أشرف عبد الباقي، قائلاً: "أنا طول الوقت مهموم بفكرة فريق العمل والروح اللي بتحكمنا. والأستاذ أشرف عبد الباقي علّمني كتير جدًا أثناء وجوده معانا في (السادة الأفاضل). هو متأثر جدًا بالمسرح، وطول الوقت حريص إن الكل يكون ملموم، ياكلوا مع بعض ويتعاملوا كفريق واحد".

وأضاف: "أشرف عبد الباقي مؤمن بفكرة العِشرة، وإن العلاقات الإنسانية مش لازم تبقى محصورة في إطار الشغل فقط، وده علّمني درس كبير جدًا".

واختتم قائلًا:"لما تكون الروح مظبوطة بين الناس، والفنانين جايين يشتغلوا بروح واحدة، وكلهم حاطين نفسهم تحت المشروع، ومافيش حد فوق حد، النتيجة بتكون عظيمة فعلًا".