داليا البحيري: «الصحة نعمة كبيرة مابيحسش بيها إلا اللي بيفقدها»
بعد أن تعرضت الفنانة داليا البحيري لحادث سير خلال الأيام القليلة الماضية، خرجت لتطمئن جمهورها عليها من خلال نشرها صورة لها عبر حسابها الشخصي على إنستجرام، وعلقت عليها قائلة: "الحمد الله حمدًا كثيرًا طيبًا مباركًا فيه، الصحة نعمة كبيرة مابيحسش بيها إلا اللي بيفقدها ولو لوقت قصير، ربنا يديم عليكم الستر والصحة وراحة البال".
وكانت قد أعلنت داليا البحيرى، في وقت سابق، عن معاناتها خلال موسم الصيف 2025، مؤكده أنه من أسوأ المواسم التي مرت عليها في حياتها.
داليا البحيري تتعرض لحادث سير
وقالت داليا البحيري، عبر حسابها بموقع تبادل الصور والفيديوهات «إنستجرام»: "الحمد لله على كل شيء طبعًا، لازم نحمد ربنا على كل حاجة وفى كل وقت اللى يعرفونى كويس يعرفوا إنى من محبى الصيف جدًا، بحب البحر والشمس والسمار ولمّة العيلة وكل حاجة فيه جميلة حتى فاكهته، لكن الحقيقة السنة دى كانت من أسوأ الصيفيات اللى عدت عليا فى الساحل».
تابعت:« مناعتي وقعت وبقالي 3 أسابيع عيانة جدا! جالي دور برد أو كورونا أو زي ما تحبوا تسموه… ولما ابتديت أخف شوية حسن جوزي اتعدى وتعب جدًا! أكتر مني بكتير لدرجة إننا اضطرينا نروح مستشفى! وقعدنا 4 ساعات هناك في الديپ فريزير!، تكييف عالي جدًا لدرجة كنا موجوعين من البرد».
وكشفت داليا البحيري، تفاصيل مرضها قالت: «رجعنا من المستشفى وبعد أقل من ساعة كانت حرارتي طلعت تاني ورقدت ومن يومها وأنا مش بتحسن».
تفاصيل حادث داليا البحيري
وأضافت:« ويكتمل السيزون برجوعي سايقة من الساحل وأنا تعبانة لأني كان عندي ارتباط مهم في القاهرة والكاوتش بتاع عربيتي يتفرتك ويطلع دخان! بحمد ربنا أنه كان عند دخلة البوابات وماكنتش ماشية بسرعة، ده ستر ربنا الجميل، باختصار كان صيف مشحون جدًا بس برضو حافضل أحب الصيف وأفضله، دعواتكم بقي أخف لأني استويت».
وأوضحت داليا البحيري قائلة:« ملحوظة أنا مش بحب اعمل بوستات زي دي عشان أنا عمري ما كنت بتاعت صعبنيات وكمان كان لازم أشكر رجال المرور اللي كلهم شهامة وساعدوني وركبولي الإستبن، أي نعم كانوا عايزين يمشوني بسرعة عشان في تشريفة سيادة الوزير معدية بس برضو جدعان».
