جلسة تجميل تتحول لكابوس.. دانا حمدان تكشف عن تشوه في وجهها

في فيديو صادم عبر حسابها الرسمي على إنستجرام، كشفت الفنانة دانا حمدان عن تعرضها لتشوهات في وجهها وآلام شديدة استمرت لأسابيع، بعد خضوعها لجلسة تجميلية بهدف تحفيز الكولاجين، قُدمت لها من إحدى العيادات على أنها "إجراء بسيط وغير مؤلم".

وقالت دانا حمدان باكية:"عدّيت بأسوأ 3 أسابيع في حياتي.. كنت فاكرة إن الحقنة مجرد سكين بوستر ومحفز طبيعي للبشرة، لكن اللي حصل كان كابوس، وفضلت أتألم لمدة شهر، ومش قادرة أتحرك أو أبص في المراية."

 دانا تهاجم العيادة: "ضحكتوا عليّ.. ومش هاعدي اللي حصل"

ووجهت دانا حمدان رسالة غاضبة إلى العيادة التي أجرت لها الجلسة، مؤكدة أنها تعرضت للإهمال والخداع، وقالت: "لو كان عندي تصوير أو تعاقدات، كنت هادفع آلاف علشان أرجّع شكلي. والمصيبة إن لما اشتكيت، كان ردهم مستفز جدًا.. كلمة (سوري) بقت أكتر حاجة بتستفزني."

وأضافت: "كان ممكن أعمل رد فعل أسوأ، بس كتمت غضبي.. لأني مش طالبة غير حقي، وأعيش بشكلي الطبيعي اللي بحبه، حتى لو بخدودي الواقعة."

معاناة مستمرة رغم الأدوية.. وشكوك حول مؤهلات العاملين

أوضحت دانا أنها رغم التزامها بالأدوية التي وصفها الطبيب بعد ظهور المضاعفات، إلا أن الألم ما زال مستمرًا، وأكدت أن ما تعرضت له يستدعي تحقيقًا من نقابة الأطباء.

وقالت:"النقابة لازم تراجع العيادات التجميلية، وتشوف إذا كان اللي بيشتغلوا فيها دكاترة بجد ولا مجرد ناس عادية بتلعب في وشوش الناس."

رسالة تحذيرية لكل من يفكر في التجميل

في ختام الفيديو، وجهت دانا رسالة تحذيرية إلى متابعيها، وقالت: "عمري ما طلعت أتكلم على السوشيال ميديا غير لما يكون في حاجة كويسة، بس المرة دي لازم أتكلم. اللي حصل معايا ممكن يحصل لأي حد، والتجميل مش لعبة. أنا مش هاحط حاجة في وشي تاني طول عمري."

واختتمت حديثها قائلة: "ربنا بيحبني وبيحميني، ويمكن ده إنذار إني أوقف. بس الألم لسه موجود، ووشي لسه بيؤلمني، وصداع في دماغي من البلازما اللي عملوهالي.. بجد رعب."