أول رد رسمي من زيزو على انتقاله للأهلي ورفضه التجديد مع الزمالك

علق أحمد مصطفى زيزو، نجم الفريق الأول لكرة القدم بنادي الزمالك على سبب فشل مفاوضاته مع الزمالك، وحقيقة انتقاله إلى صفوف النادي الأهلي في صفقة انتقال حر بداية من الموسم المقبل.

زيزو يكشف مصيره

وكتب زيزو عبر خاصية “استوري” على حسابه الشخصي على موقع التواصل الاجتماعي “انستجرام”: «أنا الحمد لله راجل بحترم كل الناس، لكن للأسف عدم ردي على المعلومات المغلوطة والتزامي الصمت زاد عن حده، كل ساعة خبر عن توقيع أو تجديد عقد زيزو وكل واحد بيغازل الشريحة اللي عايزها من الجمهور».

وأضاف«بكل وضوح، أنا لم أوقع لأي نادي سواء داخل أو خارج مصر، واللي حصل على توقيعي يتفضل يعلن إذا كان كلامه صحيح؟ كمان اللي عنده دليل على توقيعي لأي نادي برضو يتفضل يطلعه على الملأ، الناس لازم تعرف كويس أنا بقدر جدا الكيان الكبير اللي أنا بلعب فيه ولا يمكن أنكر فضله عليّ، لكن فيه حاجة أنا مكنتش حابب أتكلم فيها خالص، لأنه للأسف الأمور في الإعلام كلها في اتجاه واحد».

وتابع: « ليه محدش اتكلم عن حقوقي المشروعة زي أي لاعب في الدنيا.. ليه محدش اتكلم إن الناس سابتني بقالها شهور طويلة ومش عايزين يجددوا عقدي؟ ليه محدش اتكلم عن المستحقات المتأخرة اللي ليّا بقالها كتير. ومش لاقي حد يجاوبني ليه محدش اتكلم إنه التجديد المرة دي جاي في مرحلة متقدمة من عمري بالنسبة للاعبين في كرة القدم.. ولعيب الكرة مهما طال عمره قصير في الملعب».

وزاد: «محدش كمان اتكلم إنه ربنا سبحانه وتعالى أنعم عليّ بعروض مقابلها المالي 10 أضعاف العرض اللي موجود.. ورغم كل ده، قلت وهفضل أقول أنا منتظر كلمة النادي. ورد لإعتبارات كتير مش لتجميل الصورة. والجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف الثاني يكون عايزني أكمل.. وتكون فيه استجابة لحاجة من المعروض عليّ على الأقل.. لكن للأسف الكلام معايا حاجة.. واللي بيتقال للإعلام حاجة تانية.. أنا مينفعش أجرح في حد ولا أتكلم في حق حد.. لأن اللي بيتقال في الجلسات عيب يتقال برة.. على الأقل من ناحيتي».

وأتم: « أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي. وأي كلام هيتقال غير كده في موضوع التجديد أو التوقيع قبل الموعد ده هيكون كلام غير صحيح. ورسالتي الودية جدا للمسؤولين في النادي اللي أنا بحترمهم جميعا.. أتمنى الحوار في مسألة تجديد العقد يكون بيني وبينكم... مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على إننا نكمل الطريق. شكرا على تفهمكم موقفي».