"وحيدة في الدنيا".. العامل قتل عجوز حلوان علشان 800 جنيه

"الإدمان يعمل كتير".. دي العبارة اللي بتلخص نسبة كبيرة من الجرائم اللي بتحصل حولينا وبيكون المتهم فيها "مدمن مخدرات"، لأن المدمن وقت ارتكاب جريمته، أول حاجة بيفكر فيها هي إنه "ازاي يوفر تمن المخدرات؟".

وخلال الساعات اللي فاتت، ناس كتير أوي جاتها حالة حزن غير طبيعية، خاصة أهالي منطقة "حلوان"، والسبب إنهم صحيوا من النوم فجأة، لقيو "الحاجة فاطمة" زي ما بينادوها، ميتة ودمها مغرق أوضتها.

"الحاجة فاطمة"، واحدة ست مسنة، عمرها 92 سنة، وبعد العمر الطويل ده، طلعت من الدنيا وحيدة، يعني لا ابن ولا بنت، وكانت امنيتها انها تعيش اخر ايامها بين أربع حيطان في منطقة "كفر العلو" بحلوان، لكن للأسف، مصيرها كان صعب ومحدش يقدر يتحمله، وده اللي اكده التقرير الطبي بتاعها، بعدما لقيوها مقتولة في أوضتها!.

الجيران بعدما اكتشفوا مقتل "الحاجة فاطمة"، بلغوا قسم شرطة حلوان، وجت قوة من القسم، علشان تعاين الجثمان، فاكتشفت وجود خنق في الرقبة، وحاجتها ملقاة على الأرض، وده دليل على إن الجريمة سببها السرقة.

بدأت المباحث، تعمل تحرياتها على الواقعة، اللي بتأكد على إن المتهم لا عنده رحمة ولا إنسانية، لأنه لو كان عنده نوع من الرحمة، مكانش تجرأ على قتل واحدة ست عجوز، عمرها 92 سنة، وعايشة وحيدة، ملهاش حد في الدنيا، لكن الكارثة اللي اكتشفتها المباحث، هي إن المتهم طلع قريبها!.

وده تم اكتشافه، لما المباحث بدأت تسأل، وتعرف مين هو أكتر حد بيتردد على المجني عليها في اوضتها، فاكتشفوا إن في حد قريبها، "عامل فراشة" في المنطقة، عمره 34 سنة، وكان هو آخر واحد، الجيران شافوه طالع من عندها، ومن هنا بدأت كل الشكوك تأكد إنه هو اللي ورا الجريمة، وبالفعل تحريات المباحث أكدت ان هو القاتل بالفعل.

المباحث قالت في تحرياتها، إن المتهم في آخر مرة كان بيزور المجني عليها، الشيطان لعب في دماغه، وقرر يقتلها ويسرق فلوسها، ولما اتمسك، المباحث سألته عن سبب ارتكاب الجريمة فأنكر في البداية، لكن لما تم مواجهته بكاميرات المراقبة اللي في المنطقة، انهار واعترف انه هو القاتل، وقال إن سبب جريمته هي "السرقة".

"عامل الفراشة" في اعترافاته، قال إنه دخل على العجوز أوضتها، وبجلابيتها خنقها لحد ما وقعت على الأرض، وبعدها بدأ يفتش في دولابها، لكن ملقاش فيه غير مبلغ 800 جنيه، وبعدما اتأكد إنها ماتت، سابها وهرب.

المتهم بعد ضبطه، تم احالته للنيابة العامة، اللي اتهمته بارتكاب جريمة القتل العمد المقترنة بواقعة السرقة بالإكراه، وأمرت بحبسه 4 أيام على ذمة التحقيق.