د. ريهام حسن تكتب.. في يوم الصحة النفسية رحلة للحرية والسلام النفسي

يوم الصحة النفسية العالمي بييجي كل سنة في 10 أكتوبر، وده يوم العالم كله بيحتفل بيه علشان يرفع الوعي بأهمية الصحة النفسية ويشجع الناس تتكلم بصراحة عن مشاعرها من غير خوف أو خجل، ومنذ أن قرر الاتحاد العالمي للصحة النفسية تخصيص يوم للاهتمام بالصحة النفسية، أصبح اليوم ده تذكير بأهمية راحتنا النفسية، اللي مش رفاهية، لكنها ضرورة من ضرورات الحياة.

السنة دي، في 10 أكتوبر 2025، هيكون الاحتفال تحت شعار "الوصول إلى خدمات الصحة النفسية في أوقات الكوارث والطوارئ"، وده تأكيد على أهمية تقديم الدعم النفسي للناس اللي بيمرّوا بظروف صعبة أو أزمات زي الحروب، الكوارث الطبيعية أو حتى الضغوط الاقتصادية والاجتماعية اللي بتأثر على حياتهم اليومية. 

الشعار ده بيفكرنا إن الرعاية النفسية لازم تبقى متاحة للجميع، خصوصًا وقت الشدة، لأن وقت الأزمات بيظهر احتياج الإنسان الحقيقي للدعم والتوازن النفسي.

الصحة النفسية مش بعيدة عن حياتنا اليومية، بالعكس، دي الأساس اللي بنقدر من خلاله نشتغل، نحب، ونتفاعل مع الناس. الإنسان اللي نفسه مرتاحة بيبقى أكثر إنتاجية وإبداع، وقراراته بتبقى أوضح وأهدى. لكن مع سرعة الحياة وكتر الضغوط، كتير من الناس بقت تعاني من القلق والتوتر والاكتئاب، وده طبيعي جدًا، المهم إننا ما نهملش نفسنا ونطلب المساعدة وقت الحاجة.

السعادة مش في إنك تملك كل حاجة، السعادة الحقيقية في إنك ترضى باللي عندك، وتسعى بهدوء لتحقيق اللي تقدر عليه، وتكمل بخطوات بسيطة وثابتة من غير ما تستهلك نفسك.

 الصحة النفسية مش إنك تبقى قوي طول الوقت، لكن إنك تبقى فاهم نفسك كويس ومتعامل معاها برحمة. 

متحملش نفسك فوق طاقتها، واعرف حدودك النفسية، وخليك قادر تقول "لأ" لنفسك قبل ما تقولها لغيرك. لما تتصالح مع نفسك وتبقى صادق معاها، هتعرف توصل للحرية النفسية اللي معناها إنك تعيش على حقيقتك، مش على صورة الناس عنك.

المرونة النفسية هي المفتاح الحقيقي للتغيير، ومن غيرها مش هتعرف تتطور ولا تكبر. التغيير مش بيحصل فجأة، هو دايمًا بيبدأ بخطوة بسيطة، بخطوة وعي وفهم. 

تحقيق الذات هو إنك توصل لمرحلة مش محتاج تثبت فيها حاجة لحد، ولا تقارن نفسك بحد، لأنك راضي عن نفسك وواعي بقيمتك الحقيقية. الحرية النفسية مش فوضى، دي حرية ليها مسئولية، والمسئولية محتاجة إرادة، والإرادة قايمة على الاختيار الواعي.

وفي النهاية، الاهتمام بنفسك مش أنانية، ده خطوة نحو سلامك النفسي الحقيقي.

وفي الآخر، افتكر دايمًا إن أقوى الناس مش اللي عمرهم ما وقعوا، لكن اللي بيقوموا كل مرة وبيكمّلوا رغم كل التعب. خليك رحيم بنفسك، لأنها أول خطوة نحو السلام.