الأزهر و«الأوقاف» ينظمان 10640 ندوة لنشر الوعي والفكر المستنير خلال رمضان

نظمت وزارة الأوقاف، 10 آلاف و640 ندوة علمية خلال شهر رمضان المبارك ١٤٤٦هـ، ضمن برنامج "المنبر الثابت" المشترك مع الأزهر، وذلك في ١٣٣٥ مسجدًا، في جميع محافظات الجمهورية بعد صلاة العشاء.

 وزارة الأوقاف والأزهر الشريف

يأتي ذلك ضمن التعاون المشترك والتنسيق المستمر بين وزارة الأوقاف والأزهر الشريف، وبرعاية كريمة من فضيلة الإمام الأكبر الأستاذ الدكتور أحمد الطيب، شيخ الأزهر، والأستاذ الدكتور أسامة الأزهري، وزير الأوقاف.

كيفية تنظيم الوقت بين الشغل والعبادة والبيت في رمضان

وفي سياق آخر قالت وزارة الاوقاف عبر صفحتها على “فيسبوك”: “رمضان مش شهر كسل ونوم، بالعكس، ده فرصة عظيمة لتنظيم وقتنا وتحقيق التوازن بين الشغل، والعبادة، وحق الأسرة، ربنا سبحانه وتعالى جعل رمضان مليان بالمهام، وده بيوضح لنا إزاي نستغل الوقت ونطبّقه على يومنا كله، بحيث يكون عندنا بركة في الوقت وإنجاز في كل الجوانب”.

وأضاف: “التوازن بين الشغل والعبادة مهم جدًا، لأن الشغل جزء من حياتنا، لكن العبادة في رمضان ليها روح خاصة، ولازم نعرف نوازن بينهم. ابدأ يومك بعد السحور بالصلاة وقراءة ولو صفحة من القرآن، وبعدها ادخل في شغلك بطاقة روحانية”.

وواصلت: “ووقت الراحة استغله في الذكر أو الدعاء، ولو تقدر تقرأ آيات بسيطة يبقى أفضل. بعد الشغل، خد راحة بسيطة عشان تقدر تكمّل يومك بطاقة كويسة للعبادة والتواصل مع أهلك. وافتكر إن الصلاة في وقتها مفتاح البركة، فخليها خط أحمر وسط مشاغلك، لأنها اللي بتظبط لك باقي يومك”.

وتابعت: “وقت العيلة هو روح رمضان الحقيقية، بعد يوم مليان شغل وعبادة، بييجي وقت الأسرة، وده جزء مهم جدًّا من الشهر الكريم، الفطار فرصة حلوة إن الأسرة تتجمع حوالين سفرة واحدة، بعيدًا عن الموبايلات والانشغال بحاجات غير مهمة. بعد الفطار، ممكن تقرأ جزء قرآن مع ولادك، أو تحكي لهم عن فضائل رمضان، وكمان تخلّيهم يشاركون في العبادات. لما يكون فيه جو إيماني في البيت، ده هيحفّز الكل على استغلال رمضان بالطريقة الصح، وهيقوّي الروابط الأسرية اللي ممكن تنشغل بيها طول السنة”.

واختتمت: "إدارة الوقت بذكاء هي المفتاح، لأن رمضان فرصة لتنظيم حياتنا مش بس خلال الشهر، لكن حتى بعده. بدل ما يضيع الوقت في السوشيال ميديا أو مشاهدة أي حاجة غير مفيدة، استغل كل لحظة في حاجة تقرّبك من ربنا. خُد ورد ثابت من القرآن، ولو حتى صفحة بعد كل صلاة، واحرص على التراويح وقيام الليل، ولو مش قادر في المسجد، صلّي في البيت لكن ما تضيّعش الفرصة، وافتكر حديث سيدنا النبي ﷺ: "الصيام والقرآن يشفعان للعبد يوم القيامة" (رواه أحمد)، فخلي رمضان بداية لتنظيم وقتك طول السنة. رمضان مش جاي يعطّلنا، رمضان جاي يعلمنا إزاي نعيش صح!".