عمرو أديب: مرموش هو أمير الدوري الإنجليزي ومنقذ جوارديولا في السيتي

علق الإعلامي عمرو أديب، على تألق عمر مرموش نجم الفريق الأول لكرة القدم بنادي مانشستر سيتي ومنتخب مصر، بعد إحرازه هاتريك في فوز فريقه أمام نيوكاسل يونايتد، بالدوري الإنجليزي.

وأكد أديب عبر برنامجه "الحكاية"، أنه لا يوجد شخص كان يصدق أن الأمير المصري عمر مرموش، بيعمل الهاتريك بتاعه مع مانشستر سيتي، وجاب النصر هدية لمصر.

وتابع: "مرموش ثبت أقدامه في الأراضي الإنجليزية، أحرز 3 أجوان غير طبيعية، لو حلفت لك إنه هيجي اليوم إن هالاند يجري يحضن مرموش وجوارديولا يشوف مرموش المنقذ للمأساة بتاعت السيتي، محدش كان هيصدق".

عمرو أديب: كان عندنا ملك اسمه محمد صلاح بقى موجود أمير اسمه عمر مرموش

وأضاف: "الهدف الأول لوب غريب وعجيب، هالاند قال لمرموش أخلص من صلاح يطلع لي مرموش، شوفنا نجاح وتعب وجهد ونتاج لمن يعطي روحه وحياته للعمل".

وقال: "بعد الملك المصري بقى عندنا الأمير المصري، مرموش مكسر الدنيا النهارده وحديث العالم ومصر وبريطانيا ومانشستر سيتي، والصحف الإنجليزية وصفت عمر مرموش بالساحر، وحصل على درجة 9/10 وهي الدرجة الأعلى التي تعطى لأي لاعب في أي مباراة بالدوري الإنجليزي".

عمرو أديب: محمد صلاح يا ترى بيفكر في إيه دلوقتي؟

واختتم: "يا ترى محمد صلاح بيفكر في إيه دلوقتي، اتنين استخدموا عقلهم أوي، مرموش بعد الماتش قال المباراة دي ورايا أنا بفكر في الماتش اللي جاي، وصلاح يرى نجما جديدا يصعد لكن اتعلمنا في الدوري الإنجليزي والدوريات الأوروبية اللاعب موسم مش ماتش، وأداء وأرقام وسرعات وتوقيتات، يا ترى إيه اللي هيحصل بفكر أروح أتفرج على ماتش ليفربول والسيتي هناك”.